Vokshi kundër Bashës : Basha nuk ka të drejtë për vendimmarrje

Deputetja e Partisë Demokratike, Albana Vokshi i ka dalë në krah Belind Këlliçit në debatin që po zhvillohet në selinë blu ku Lulzim Basha kërkoi të zhvillohen zgjedhje për kreun e ri të FRPD-së.

Gjatë një postimi në rrjetet sociale, Vokshi thotë se Basha në bazë të statutit Basha nuk ka të drejtë vendimmarrje për FRPD-në.

Pas takimit me forumin rinor, Belind Këlliçi pasditen e së premtes reagoi duke e shpallur “nul” vendimin e Bashës ndërsa theksoi se do të jetë prezent në foltoren e thirrur nga Berisha ditën e diel.

Reagimi nga Albana Vokshi:

Partia Demokratike ka nevojë për demokraci, jo arbitraritet!
Statuti i Partisë është i qartë: vendim-marrja e brendshme nuk lihet në një dorë. Përkundrazi, ajo është e shpërndarë mes një sërë organesh dhe drejtuesve të ndryshëm.

Organizatat Partnere të Partisë Demokratike, LDGSH dhe FRPD, janë forume që organizohen dhe drejtohen në bazë të Statutit të tyre. Askush, as Kryetari i PD, nuk ju merr dot vendimmarrjen.

Asnjë organ, asnjë funksionar nuk mund të uzurpojë pushtetin që statuti ja njeh një forumi, organi apo funksionari tjetër.

Vecanërisht në situata debati apo përplasjesh të brendshme, inati, hakmarrja, intrigat nuk duhet të prevalojnë ndaj statutit.

Përkundër, Statuti është vendimtar dhe mbi të gjitha ceshtjet e mbi te gjithë.
Pas 31 vjetësh, cdo demokrat është në mision, për t’u bashkuar për të ringritur partinë nëpërmjet fuqizimit të anëtarësisë, forcimit të demokracisë të brendshme, respektimit të fjalës dhe mendimit të lirë.