PD: Kryebashkiaku socialist i Vorës Agim Kajmaku me precedent penal në Greqi!

Pas betimit të Kryetarit të Bashkisë Vorë, Zyrtarët e lartë të Partisë Socialiste, Aldrin Dalipi dhe Ervin Bushati, duke mos i besuar as syve, bënin selfie me Agim Kajmakun! A ishin në dijeni se fjala ishte për një person të arrestuar dhe të dëbuar nga Greqia, siç përflitej, përvoja me Valdrin Pjetrin tregon se Bushati dhe Dalipi kishin arsye për selfie ndërsa sot Partia Demokratike sjell dëshmi që konfirmojnë se PPSH mund të ndryshoj emrin por jo edhe anëtarsinë që ka, kriminale!
Sot Partia Demokratike përmes një kërkese të firmosur nga Sekretari i Përgjithshëm i PD, Gazment Bardhi, kërkon nga Prokuroria e Përgjitshme verifikimin e Agim Kajmakut të Vorës. Kjo kërkesë bëhet në kushtet kur ekzistojnë të dhëna, të bëra publike më parë, se Agim Kajmaku është subjekt i Ligjit të Dekriminalizimit dhe nuk mund të ushtrojë funksion publik.
“Ai dyshohet se ka qenë i arrestuar/ndaluar në Greqi dhe, më pas, ndaj tij është marrë masa e dënimit dhe dëbimit nga autoritetet përgjegjëse greke.” thuhet në kërkesën e Sekretarit të Përgjithshëm të PD duke shtuar se për 12 vjet me radhë, Agim Kajmaku nuk ka udhëtuar në Greqi, megjithëse ka jetuar aty disa vjet me një emër tjetër.
“Në Formularin e Vetëdeklarimit shtetasi Agim Kajmaku alias Jorgo Toro ka deklarur se ka jetuar për 5 vite në Greqi. Nga verifikimi i të dhënave të sistemit TIMS rezulton se shtetasi Agim Kajmaku alias Jorgo Toro nga periudha 2004 – 2016 nuk ka udhëtuar në asnjë rast të vetëm në drejtim të Greqisë, çka përbën një indicie për saktësinë e të dhënave të bëra publike më parë,” argumenton Partia Demokratike në kërkesën për verifikimin e figurës së Agim Kajmakut, që mban.
Njësoj si në rastin e Valdrin Pjetrit, per te cilin prokuroria nuk ka akoma një përgjigje, PD e ka shoqëruar kërkesën e saj me 500 firma qytetarësh.
“Nisur nga interesi i lartë publik që paraqet kjo çështje, Partia Demokratike e Shqipërisë pret një verifikim dhe reagim institucional të shpejtë nga ana e Prokurorisë së Përgjithshme, me synimin që të arrihet qëllimin primar që ka ligji i dekriminalizimit. Konkretisht, qëllimi i ligjit është të garantojë besimin e publikut në funksionimin e organeve të zgjedhura shtetërore, nëpërmjet pengimit të zgjedhjes ose emërimit në to të personave, të cilët janë dënuar për kryerjen të krimeve,” thuhet në kërkesën e firmosur nga Sekretari i Përgjithshëm i Partisë Demokratike, Gazment Bardhi.