Mali i Zi, nis lehtësimi i masave ndaj COVID-19

Autoritetet shëndetësore thanë se këtë javë në Mal të Zi u shënua një ulje e theksuar e të infektuarve me COVID-1

Drejtori i Institutit të Shëndetit Publik Dr. Boban Mugosha duke paraqitur të dhënat më të reja tha se epidemia e koronavirusit ëhstë nën kontrolle dhe se numri i të infektuarve, ditëve të fundit shënoi një rënie.

“Këtë rezultat të mirë në luftën ndaj koronavirusit e tregon edhe grafikoni ku vërehet një rënie e personave të infektuar dhe rritja e numrit të personave të shëruar”, tha Dr. Mugosha.

Kjo situatë e mirë epidemiologjike ka ndikuar që Trupi Kombëtar Koordinues për sëmundjet infektive të shpallë planin e lehtësimit të masave të ndërmarra për shkak të pandemisë. Lëvizja e qytetarëve u lejua deri në orën 11 të mbrëmjes, kurse shitoret do të punojnë deri në orën 10 të mbrëmjes. Poashtu u hoqën edhe masat e veçanta dhe kufizuese që ishin në fuqi prej 24 marsit për banorët e Komunës së Tuzit në Malësi.

Dr. Mugosha e vlerësoi disiplinën e banorëve të Malësisë duke theksuar se epidemia në këtë zonë është nën kontrolle të plotë.

“Në Qendrën Klinike të malit të Zi janë shëruar personat e infektuar nga Tuzi në mënyrë shumë të suksesshme. Nga kjo zonë janë shëruar 30 persona, kurse në proces shërimi janë edhe 7 persona tjerë, gjë e cila tregon se epidemia në Tuz gati tërësisht është ndaluar”, tha Mugosha. Kjo sipas tij tregon se vetdisiplinën e banorëve që u bë shembulli më i mirë në Mal të Zi në luftën kundër COVID-19.

Masat e para parandaluese në Mal të Zi janë vendosur me 10 mars, kur autoritetet shëndetësore vendosen ndalimin e udhëtimit në vendet e prekura nga koronavirusi, ndërsa pas shfaqjes së rastit të parë të infektuar me COVID-19, masat kufizuese kanë ardhur duke u shtrënguar.