Kosovë: 79 raste të reja me koronavirus – numri më i lartë i konfirmuar në një ditë

Në Kosovë autoritetet konfirmuan të dielën mbrëma 79 raste të reja të të prekurve me COVID-19, që është numri më i lartë i konfirmuar në një ditë që nga shfaqja e rasteve të para më 13 mars.

Sipas Institutit Kombëtar të Shëndetësisë Publike, 35 prej tyre janë nga komuna e Ferizajt, 16 nga komuna e Prizrenit, 6 raste në Han të Elezit, 6 raste nga komuna e Vitisë, 3 nga komuna e Gjilanit, 2 nga komuna e Malishevës, 2 nga komuna e Vushtrrisë dhe nga 1 rast në Skënderaj, Klinë, Rahovec, Fushë Kosovë, Istog, Mitrovicë e veriut, Leposaviç, Zubin Potok dhe Kamenicë.

Rastet e konfirmuara të dielën e çuan në gjithsej 362 numrin e të prekurve.

Po sot autoritete shpallën një të shëruar duke e çuar në 59 numrin e përgjithshëm të të shëruarve. Gjithsej 7 veta kanë humbur jetën deri tani nga koronavirusi.

Sipas institutit që nga 8 shkurti janë kryer gjithsej 3 mijë e 256 teste.

Të dielën mbrëma qeveria në detyrë paralajmëroi shtrëngimin e masave në luftën kundër koronavirusit.