Identifikohet bashkëautori i vrasjes së Behar Sofisë, ekzekutohet masa e sigurisë 

 

Ditën e sotme, janë mbyllur hetimet për vrasjen e shtetasit Behar Sofia, 66 vjeç, i cili u ekzekutua në 25 shkurt të këtij viti. Sipas hetimeve të policisë, personi i cili ka qenë bashkëautori i vrasjes së 66 vjeçarit, është 45 vjeçari Bujar Leza i cili aktualisht është i burgosur në burgun e Fushë Krujës për veprën penale “Dhunë në familje”.

Kujtojmë që Behar Sofia i cili njihej si “padron droge”, u ekzekutua me armë zjarri nga Ernest Shyti pranë piramidës.

Njoftimi i Plotë:

DVP Tiranë

Vijojnë veprimet e thelluara hetimore për zbardhjen e plotë të ngjarjes së ndodhur më 25 shkurt 2021.

Identifikohet bashkëpunëtori i autorit të vrasjes së shtetasit Behar Sofia.

Ekzekutohet masa e sigurisë “Arrest në burg” për 45-vjeçarin Bujar Leza.

Në vijim të veprimeve të thelluara hetimore të kryera nga ana e Sektorit për Hetimin e Krimeve të Rënda ndaj Jetës dhe Pronës në DVP Tiranë, në drejtimin e SPAK-ut, për zbardhjen e plotë dhe dokumentimin me prova ligjore të ngjarjes së ndodhur më datë 25 shkurt 2021, ku u vra me armë zjarri shtetasi B. S., 66 vjeç, si rezultat i hetimeve dhe provave të grumbulluara është bërë i mundur identifikimi i bashkëpunëtorit në këtë vrasje.

Bazuar në provat e grumbulluara, Gjykata e Posaçme Kundër Korrupsionit dhe Krimit të Organizuar ka caktuar masën e sigurisë “Arrest në burg”, për shtetasin B. L., 45 vjeç, banues në Larushk, Krujë.

Specialistët e Sektorit për Hetimin e Krimeve të Rënda ndaj Jetës dhe Pronës në DVP Tiranë kanë bërë ekzekutimin e masës së sigurisë ndaj këtij shtetasi, në ambientet e burgut të Fushë Krujës, i cili ndodhet i paraburgosur për veprën penale “Dhuna në familje”.

Materialet i kaluan Prokurorisë së Posaçme Kundër Korrupsionit dhe Krimit të Organizuar Tiranë, në ngarkim të shtetasit B. L., për veprat penale “Vrasja me paramendim” dhe “Mbajtja pa leje e armëve, armëve shpërthyese dhe municionit”, kryer në bashkëpunim të veçantë, atë të grupit të strukturuar kriminal, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.