Drogë me dron në Burgun e Shënkollit, arrestohen 3 persona. Policia jep detaje…

Tre persona kanë tentuar të fusin lëndë narkotike në ambientet e Burgut të Shënkollit në Lezhë nëpërmjet një droni.
Ngjarja e pazakontë ka ndodhur mbrëmjen e kaluar, ku droni po transportonte një pako të dyshimtë. Për këtë arsye, efektivët e policisë së burgut kanë marrë masa për monitorimin e mjetit fluturues deri në uljen e tij jashtë territorit të burgut.
Tre persona kanë përfunduar në prangat e policisë, përkatësisht M.V., 28 vjeç banues në fshatin Vrake, Malësi e Madhe, i dënuar më parë për vjedhje, Xh. K., 25 vjeç, banues në Shkodër si dhe Xh.L., 28-vjeç, banues në Bajzë, Malësi e Madhe.
Nga kontrolli që u bë pakos u gjetën 3 celularë, 3 karta celularësh 7 qese të presuara me lëndë narkotike e dyshuar si canabis sativa.
Njoftimi i policisë: Policia e Shtetit në bashkëpunim me Policinë e Burgjeve parandaluan dhe goditën një tentativë të futjes në ambientet e burgut të lëndëve narkotike dhe telefonave celularë me anë të dronit.
Në orët e vona të mbrëmjes, në rrethimin e jashtëm të burgut të Shënkollit , punonjësit e Policisë së burgut që kryenin shërbim kanë konstatuar se po fluturonte një dron duke hyrë në zonën e ndaluar dhe menjëherë kanë njoftuar Policinë e Lezhës.
Në drejtim të burgut janë nisur forcat e FNSH të Shkodrës të cilat ishin me shërbim në Lezhë si dhe shërbimet e policisë së Lezhës së bashku me grupin hetimor.
Falë reagimit dhe veprimeve të shpejta dhe profesionale u bë e mundur bllokimi i dronit në rrethin e dytë të jashtëm të burgut, ku gjatë këqyrjes në trup të dronit u gjetën të lidhura në një qese plasmasi 7 pako me lëndë narkotike si dhe tre telefona celularë.
Gjithashtu po në vijim të veprimeve tek pjesa e pasme e burgut ne nje distance 1km, Policia e Lezhës dhe FNSH ka konstatuar dhe bllokuar një automjet ku brenda të cilit ndodheshin tre persona.
Gjatë kontrollit në automjet, policia gjeti dhe sekuestroi telekomandën e dronit që u sekuestrua brenda rrethimit të dytë të jashtëm të burgut, çanta ku futet droni, si dhe tre aparate të tjerë celularë.
Në përfundim të veprimeve u bë arrestimi në flagrancë i shtetasve:
M.V., 28 vjeç banues në fshatin Vrake, Malësi e Madhe, i dënuar më parë për vjedhje
Xh. K., 25 vjeç, banues në Shkodër,
Xh.L., 28 vjeç, banues në Bajze, Malësi e Madhe, Shkodër
Materialet do ti kalojnë për hetime të mëtejshme Prokurorisë Pranë Gjykatës Shkalles së Parë Lezhe për veprat penale “Prodhimi dhe shitje te narkotikeve” dhe “Futja ose mbajtja e sendeve të ndaluara në institucionin e ekzekutimit të vendimeve me burgim e mbetur ne tentative”