Basha: Të dënohen 22 vite burg dhe të përjashtohen përjetësisht politikanët që përfshihen në krime zgjedhore

 

Partia Demokratike ka propozuar ndryshimet në Kodin Penal duke ashpërsuar dënimet për këdo që kryen krime zgjedhore.

Gjatë një postimi në rrjetet sociale, Basha ka kërkuar që çdo politikan që përfshihet në të tilla skema të dënohet me 22 vite burg dhe të përjashtohet përjetësisht nga politika.

“Krahas vettingut në politikë, me qëllim dhënien fund njëherë e mirë lidhjeve të botës së krimit me politikën, PD do të propozojë ndryshimin e Kodit Penal, në përputhje me Kodin Penal italian (n. 416 ter), duke ashpërsuar dënimet për këdo që kryen krime zgjedhore.

1. Kushdo që pranon drejtëpërdrejtë apo nëpërmjet ndërmjetësve, premtimin për të fituar vota nga elementë të krimit të organizuar, në shkëmbim të parave apo favoreve të tjera, dënohet me 15 vite burg.
2. I njëjti dënim parashikohet edhe për elementët e krimit të organizuar që kanë dhënë premtime të tilla, apo këdo tjetër që rezulton i përfshirë.
3. Nëse politikani, i përfshirë në një skemë të tillë, zgjidhet, ai dënohet me 22 vite burg.
4. Politikanit dhe kujtdo që përfshihet në veprimtari të tilla i ndalohet përjetësisht ushtrimi i funksioneve publike”, shkruan Basha.