Basha takon ministrin austriak: Anëtarësimi i Shqipërisë në BE,prioritet absolut i PD

Kreu i Partisë Deokratike, Lulzim Basha është takuar me Ministrin për Europën dhe Çështjet Ndërkombëtare të Austrisë, Michael Linhart. Kryedemokrati ka zbardhur detaje nga ky takim, ku thekson se anëtarësimi i Shqipërisë në BE mbetet prioritet absolut i PD.

“Me kënaqësi prita Ministrin për Europën dhe Çështjet Ndërkombëtare të Austrisë, Z. Michael Linhart, të cilit i shpreha mirënjohjen për mbështetjen e çmuar dhe të kahershme të Austrisë për Shqipërinë, e në veçanti në përpjekjen tonë historike për integrimin në Bashkimin Europian.

Ndava me të prioritetet e Partisë Demokratike për garantimin e zgjedhjeve të lira dhe të ndershme, për luftën kundër krimit të organizuar dhe korrupsionit, për prerjen e lidhjeve të politikës me krimin, që për shumë gjatë e kanë penguar dhe vonuar rrugëtimin tonë drejt BE-së.

Jam i lumtur që me Ministrin dhe përfaqësuesin e simotrës tonë Partisë Popullore të Austrisë, bashkëndajmë bindjen se Bashkimi Europian është alternativa e vetme për rajonin, si dhe e sigurova se anëtarësimi i Shqipërisë në BE mbetet prioritet absolut i Partisë Demokratike, si garanci për ndërtimin e një të ardhmeje më të mirë për qytetarët shqiptarë,” shkruan Basha.