Basha: Nuk ka pasur besë mes meje dhe Sali Berishës, që të shkelmonim sakrificën e demokratëve

Kreu i opozitës është shfaqur i prekur në një video të postuar në Facebook ku flet për akuzat e Sali Berishës që e quan Bashën besëprerë.

Duke rikkujtuar takimin me Berishën kur ishte vetëm 17-vjecc, Basha thotë se e vetmja besë që i ka dhënë Berishës është angazhimi pa kushte për demokracinë dhe Shqipërinë.

Teksa e quan një fyerje të rëndë këtë etiketim nga Berisha, kreu i PD-së ndër të tjera shprehet se kurrë nuk ka pasur një lidhje bese me Berishën për të mbrojtur njëri-tjetrin duke shkelmuar sakrificat e demokratëve.

Postimi i Lulzim Bashës

Të vetmen besë që kam lidhur me Sali Berishën, që ditën e parë që i kemi dhënë dorën njëri-tjetrit kur kam qenë vetëm 17 vjeç, ishte për angazhimin dhe përkushtimin tim pa asnjë kusht për demokracinë, për Partinë Demokratike, për demokratët, për Shqipërinë . E njëjta besë ka qenë edhe në 2005, kur u angazhova me gjithë forcat e mia për fitoren e Partisë Demokratike, e më pas për përmbushjen e projekteve që ndryshuan njëherë e përgjithmonë Shqipërinë, të cilat i rikthyen dinjitetin shqiptarëve. Kurrë nuk ka pasur marrëveshje e as besë mes meje dhe Sali Berishës, që të shkelmonim sakrificën e demokratëve, për të mbrojtur njëri-tjetrin nëse cënoheshin interesat personale. Që pas 9 shtatorit gjithkush është shtangur nga etiketimet që Sali Berisha ka bërë ndaj meje. Natyrisht unë nuk kam ndërmend të shkel mbi vitet e bashkëpunimit me të, në të mirë të shqiptarëve dhe Shqipërisë . Besa ime është për ta dhe për çdo demokrat, siç ka qenë ditën e parë.

https://www.facebook.com/lulzimbasha.al/videos/261786752663240/